أحب اني اشارككم معاي في رحلتي لماليزيا في شهر فبراير الماضي … واتمنى انكم تستفيدون منها
هو اني لما حبيت اطلع لماليزيا لقيت ناس كاتبين عنها بس قليل منهم اللي استفدت من رحلتهم … فقلت يابو خليل مالك الا تكتب عن رحلتك وتخلي غيرك يستفيد من الأشياء اللي طحت فيها …
التقرير بيكون فيه صور كثير لذلك اللي حاب انه يقراه يضغط على
نبداء على بركة الله ..
أحب أقولكم ان هذي رحلتي الثانيه لماليزيا …
الأولى كانت لشهر العسل … والثانيه لشهر الجبن
الرحله هذي اللي بكتب عنها هي الثانيه وكانت بشهر فبراير الماضي
راح أبداء مع نصائح قبل ركوب الطائره :
1- أهم حاجه تشوف لك مكتب كويس معروف بخدماته ويستحب لو يكون احدقبلك مجربه…لأن المكاتب أحياناً توهقك مع الحجوزات..
2- التأكد من تاريخ انتهاء الجواز..
3- صرف العملات لدولار أو الى رنجت (العمله الماليزيه).
4- بما ان ماليزيا دولة استوائيه يعني جوها اما رطب أو معتدل فعليك باختيار الملابس المناسبه ( آخر شئ تفكر فيه لبس الجنز)
5- بما ان الرحله طويله يحبذ لو تاخذ معك كتاب تقراه لأن السوالف بتخلص (8 ساعات تقريباً)
6- لبس الملابس المريحه للطائره … ابتعد عن التكشخ أهم شئ الراحه
بالنسبه لي حجزت على الخطوط القطريه … لأن أسعارها كانت مناسبه وطياراتها جديده أيضاً …
بس عيبهم انهم تأخرو في مطار الدوحه في الترانزيت … علشان كذا لما تجي تحجز تأكد كم المده اللي بتاخذها في المطار … حتى لو قالك المكتب ساعه وحده بس … عليك انك تتاكد من وقت الاقلاع ووقت الوصول… اذا طلع 9 ساعات معناه انك بتقعد ساعه بس اما اذا طلع اكثر فمعناها انك بتنقع ..
المهم طلعنا للطياره ووصلنا لمطار كوالالمبور …
قبل الهبوط يعطونك أوراق تعبيها … تأكد من تعبئتها لأنك لما تنزل المطار بيطلبونها منك … علشان ماتتعطل عبها وحطها بوسط الجواز …
عند نزولك للمطار توجه الى القطار الذي سوف ياخذك لمكان الشنط والجوازات …
أنا متجه للقطار شدتني الدعايه اللي على باب القطار
بعد انهاء اجراءات المطار والجوازات وعند رغبتك للتوجه لكوالالمبور عندك خيارين ام التاكسي أو القطار
في البدايه خذ التاكسي ( وبعدين بنرجع للقطار )
* إتجهت الى الفندق اللي قعدت فيه أول أيام شهر العسل اللي هو فندق ( بان باسفيك pan pacific ) فندق خمس نجوم
خدمته ممتازه وغرفته جميله جداً … بالقرب من مجمع Mega Mall …. الآن تم تغيير اسم الفندق (لايحضرني الاسم )
* كوالالمبور يميزها توفر جميع الأشياء فيها … من حدائق للطيور وللفراشات ومن المجمعات التجاريه كبيرها وصغيرها
فلن تحتار فيها أبداً
* الأماكن التي زرتها وأنصح بزيارتها في كوالالمبور:
- برج Twin Towers
يوجد به مجمع تجاري فيه أغلب الماركات العالميه … أغلبها مو موجود عندنا … ويحوي على مطاعم فخمه وجميله …
وتقام فيه بعض الفعاليات … مثل فرقة الطبول اللي بالصوره
*مجمع التايم سكوير
* Aquaria بالقرب من البرجين وخلف فندق ماندرين .. عباره عن أكبر حوض مائي في آسيا .. هذا على رواية سواق التكسي … بس جد المكان ابدااااااااااع
وهذا الطريق يوصل بين السوق اللي في البرجين التوأم وبين الحوض المائي
يختصر المسافه بقوه
طبعاً فيه معالم كثير في كوالالمبور تستحق الزياره … وأنا قمت بزيارتها عن طريق أخذ جوله سياحيه من نفس الفندق … تمتد من التاسعه صباحاً الى الخامسه عصراً
جــنتنــق 
وكان لي زياره لجنتنق وهي تبعد عن كوالالمبور 45 دقيقه … وهي مدينه بارد جوها …لوجودها في مكان مرتفع…توصل لها عن طريق التلفريك
ويوجد فيها ملاهي خارجيه ومجمع تجاري بداخله ايضا ملاهي … يوم شفت المجمع بداخله الملاهي والمطاعم وانهار فيها قوارب … تحس بالحماس … كل شئ حولك لعب ووناسه وتتقضى اغراضك ومطعمك حولك بعد … وش تبي أكثر؟؟
لاحظ المحلات والألعاب فوقها … والسفينه البيضاء اللي فوق هذي تدور المجمع كله … وفيه قطار سريع بعد
هذي احد العروض داخل المجمع
للأسف ماقدرت أصور برى المجمع لأني الجو كان جداً بارد وضبااااااااااب ماتقدر تشوف مترين قدامك … لدرجة انهم وقفو جميع الألعاب الخارجيه … فما قدرت أصور هالمره … لكن المره اللي فاتت صورت في الخارج وبحاول ارفقها لما القى الصور
… وهذي بعض الصور من النت
لـــــنكــاوي
طلعنا من كوالالمبور الى جزيرة لنكاوي … طبعاً أنا قاطع التذاكر من السعوديه … لأنه كان فيه عرض من الخطوط القطريه يشمل الرحلات الداخليه ..على الخطوط الماليزيه
ولنكاوي جزيره جداً جداً هادئه …. تصلح تكون للإستجمام بعد ازعاج المدن … بعد نزولنا في المطار توجهنا لمنتج الشيرتون
منتجع الشيرتون شئ خيالي … قمه في الروقان … يحتوي على صاله رياضيه و على قسم للتدليك بالزيوت الطبيعيه والأحجار … وقسم السونا والجكوزي …. ويحتوي على عدة مطاعم بحريه تجيب العافيه …. وجلساته جداً ممتازه.
عند الوصول استقبلونا بعصير اسمه ريلاكس … عباره عن ليمون مع نعناع يجيب العافيه … وجلسنا في اللوبي على ماتاكدو من معلوماتنا وحجزنا … وبعدها طلعنا بسياره زي حقة القولف بس طويله … علشان توصلنا لشاليهنا أو غرفتنا
وهذي بعض الصور للمنتجع
اللوبي
مكان الفطور
مناظر من بلكونة اللوبي
الغرفه
الجكوزي والحمام اجلكم الله
الغرفه أو خلنا نقول الشاليه من الخارج
زي ماقلت لكم الشاليهات روعه والخدمات وسرعة تقديمها جداً مرضي
…….
بعد ماقضينا أول يوم في المنتجع … طلعنا لمرفئ اليخوت على وقت الغروب تقريباً … وكان الجو جداً رائع
المنطقه هذي فيها مطعم كنتاكي ومطعم عربي رايح فيها
… خذينا وجبتنا وقعدنا على الجلسات اللي تطل من البلكونه على البحر …
وهذي صور للمرفئ
وهذي محطه بجوار المرفئ وفيها سوبر ماركت ممتااااااااز … عجبتني المحطه … وقارنت بينها وبين اللي عندنا
وفي اليوم التالي خذينا جولة بالقارب … ويسمونها سواقين التكاسي ( جوله ) … وتقدرون تكلمون هذا السواق … رجال كبير في السن ومحترم ويتكلم عربي ومعاه باص جديد …
اسمه يعقوب … ورقمه 0134374594
كل شئ في لنكاوي عنده… من صرف عمله الى حجز فنادق الى جولات سياحيه
المهم رحنا للي يسمونه جوله … وهي عباره عن رحله بالقارب في النهر ويتخللها زياره للكهوف وزياره لحديقة الأسماك وإطعام النسور وسباحه في البحر مثل مابنشوف في الصور …
هذا المرشد السياحي وحنا في القارب
زيارة للكهوف ( وفي هذي الصوره المدام كانت جنبي لا ترى ولا تتكلم ولا تتنفس
إطعام القرود
إطعام النسور … هذي سبحان الله نسور بريه لكنها عارفه للقوارب …. لما يمر القارب ينثر لها سمك وبعدين يقطعه لها بمروحة القارب … وتنزل النسور تلتقط السمك في منظر رهيب
وهنا حديقة الأسماك … عباره عن براميل ومحطوط فوقها خشبان وصارت حديقة مائيه للأسماك … يعني مايقدرون يسون زيها هنا؟؟
هذا السمك اللي يقذف بالماء (يتفل)
ليسقط الخبز اللي مثبت على اللوح … سبحان اللي علمه
وهنا تبين البراميل والليحان اللي فوقها … عمل جدا بسيط … طبعا المربعات هذي عباره عن احواض لأنواع من الأسماك واللخمه والقباقب وغيرها
وبعد انتهاء الجوله تروح لمطعم ويكون فيه بوفيه بحري …. في انواع من السمك مشويه مع بعض الفواكه …
ايه صح … نستمر نمشي في النهر الى ان نوصل للبحر … ويوقف القارب ويقولك اذا تبي تسبح طب … طبعاً الماء خيالي … صح انه في البحر لكن الماء حلو … لأنه عند مصب النهر..
في اليوم التالي طلعنا لأحد الشواطئ وركبنا الجتي سكي
طبعاً الألعاب المائيه شئ خيالي … وأسعارها جداً معقوله … طبعاً ركبنا الجتي سكي وركبنا البرشوت وفي بعض الألعاب الأخرى بس ماركبناها … مثل الموزه
والجدير بالذكر ان لنكاوي فيها كم مجمع تجاري في أشياء حلوه يعني … واللي حاب يطلع للمدينه يحاول يروح بدري شوي يعني على العصر … لأنهم يسكرون بدري
وفيها برضو حوض للأسماك وبعض الحيوانات المائيه مثل البطريق واللفقمه مدري اللخمه … لكن الحوض اللي في تكلمنا عنه في كوالالمبور أكبر وأحلى …
وبعدين رجعنا مره ثانيه على الخطوط الماليزيه لكوالالمبور وقضينا فيها باقي الأيام
كوالالمبوربعد وصولنا لمطار كوالالمبور … ماركبنا التاكسي هالمره … جربنا القطار … وهو قطار سريع نسبياً ويوصل أسرع من التكسي بكثير … ويوصلك الى قلب المدينه ومنها طلعنا للفندق ..
في رجعتنا سكنا فندق ماندرين
لمشاهدة صور هذا الفندق الرااااااااااائع (من قلب أقولها )
على هذا اللنك
http://www.mandarinoriental.com/hotel/520000066.aspطبعاً الفندق لايعلى عليه من ناحية الفخامه ولا من ناحية الموقع
مثل ماهو مبين بالصوره فان افندق ملاصق للبرجين … بدون مبالغه 20 خطوه الا انت داخل المجمع
وحبيت ان اخلي الفندق هذا في آخر الأيام علشان موقعه بحيث ان كل شئ حولي
وفي الفتره الأخير تقضينا من السوق ولملمنا أغراضنا ورجعنا لديارنا أنا والمدام غانمين من هالسفره
طبعاً هذي تفاصيل السفره الثانيه … أما الأولى كان فيها بعض الأمور اللي تفاديتها بالسفره الثانيه وراح أذكرها الحين:-
1-في زيارتي الأولى قمت بزياره(
لصنواي لاقون ) وكانت تعتبر غلطه من غلطات السفره … صنواي لاقون عباره منتج مائي فيه ألعاب مائيه ومسابح … أنا لما شفت الصور انبهرت فيه … ولكن لما رحت له اكتشفت انه مايناسبني … لأن أغلب العالم ماخذين راحتهم باللبس من رجال و نساء … مفروض اني أعرف هالشئ من قبل … بس كانت غلطه … لكن فيه مجمع تجاري حلوه مره
2- في زيارتي الأولى خذيت لي يومين في
الأفاموساوهي عباره عن ملعب قولف وفيه غرف وفلل بمسبح خاص … وفيه حديقة حيوان سفاري وفيه عروض لبعض الفررق..
الغلط اللي سويته اني خذيت فيه فيلا لمدة يومين … صح ان الفيلا حلوه وفيها مسبح خاص مغطى … بس كان العيب الفادح اللي في الفيلا ان فيها سحالي ( ضواطير , بريعصي ) والسحالي هذي اشبه بالتماسيح … لأن الفيلا فيها مداخل من النوافذ … ولا الباقي ميه ميه … فاللي حاب يروح للأفاموسا يروح له الصباح ويحضر العروض وحديقة الحيوان ويرجع باللليل … تسوى الروحه بس لاتنامون
3-بعض مكاتب السياحه ..لما تحجزيعرض عليك توصيل من والى المطار … طبعاً محسوبه عليك مو ببلاش.. ولو تروح وتاخذ لك تكسي يطلع لك ارخص بكثير … الا ان كانك تبي تكشخ عاد بكيفك
4- لاتاخذ راحتك في التشري وأخذ الهدايا … لأنك لما ترجع راح ياخذون عليك وزن زايد بضعف قيمة الهدايا … أنا آخر مره طلبو مني 1500 ريال تقريباً قيمة شحن زايد … بس الحمد لله ان كانت معي شنظة ظهر .. دخلت الأغراض فيها وصار مافيه شحن زايد.
5- لا تنسى تأكد حجز الرحلات الداخليه ورحلة الرجوع … هذي الخدمه الفندق يسويها لك … ماعليك الا انك تعطيه التذاكر ..
6 – أنا جربت السفره بشهر 6 وجربته المره اللي بعدها بشهر 2 … بشهر سته كان الجو رطوبه مررره … بس المره الثانيه بشهر 2 كان خيالي ومافيه رطوبه ابد … فأنصح اللي يبي يروح يتأكد من الجو قبل.
7- كثر من الملابس القطنيه الخفيفه … لأنك كل طلعه بتغير ملابسك … يعني باليوم بتغير ثلاث اربع مرات على القليل |… وماتبي كل شوي تروح تغسل ملابسك .
8- لاتآخذ شناط السفر من ماركه غاليه … لأنها بالعفش بتتحذف وبتتكسر … يعني أنا رايح بشنطه ب40 ريال ماخذها من جيان ماركه ( طقها والحقها ) ولا أحلى منها ولما رجعت بستها وقطيتها …
9- اختار حذاء مريح للمشي ويفضل انه يكون مفتوح ( صندل ) علشان رجلك تتهوى وتكون مرتاح … ابتعد عن الجزم المسكره .
10- لاتنسى تآخذ معك كاميرا فديو وكاميرا عاديه مع عدتهم واشرطتهم والشواحن.
11- خذ معك بندول وفيتامين سي وحبوب للاسهال او التوعك المعوي ولزقات جروح والذي منه… لزوم التمشي والمغامرات … لأن الأشياء هذا ممكن تحصل مع تغير الجو أو مع تغيير انواع الطعام.
12- اممممممممممم اذا جاء شئ في بالي بحطه
لمزيد من المعلومات حمل هذي الملفات فيها شرح وافي عن ماليزيا وماتحتاجه فيها
1-
malysia حجم الملف 413 كيلو بايت
2-
(malysia(2 حجم الملف 1 ميقا
من باب الأمانه الصور اللي ماعليها اسم موقعي
www.brhom.net ماهي تبعي … ولكن خذيتها من النت لتوضيح الصوره كامله لديكم ياقراء مدونتي الأعزاء.
أرجو أن أكون أضفت شئ اليكم … وأن تستفيدو من هذه الرحله
لم أذكر أسعار الفنادق لأنها غير ثابته … فحسب الموسم تتغير … ولكن بالنسبه للمصروف اليومي فهو جداً معقول … وتطمو مافيهم الجشع اللي عندنا … كل شئ بنظام…
ودمتم بود
