من فرحتي بالموعد اللي شرفه داعي نداك
جيتك أحن من الطفل لاحضان أم ٍ ترضعه
000
جيتك أسابق خطوتي وش ما أسابق في لقاك..؟
مشوار ياخذله سنه لك في سويعات أقطعه
آجيك بر وبحر.. جو.. لومشي تستاهل عناك
يا من إذا ضاقت بي الدنيا لقيت ابك السعه
000
يتعبني المشوار..؟ عادي/ كلما جاني فداك
لو موعدك فآخر بقاع الأرض والله ما ارجعه
ياللي حضورك كنه الما.. والتراب يصير ماك
وشلون باتيمم.. وصوت الما يثور بْمنبعه..؟
000
يا غاية القلب الذي ما جاز له إلاّ هـواك
لاجاك قلبي من ضماه لْمنبعك لا تمنعه
شف وجه قلبي من الغلا من وين ما ينظر لقاك
لوهي جهاته أربعه فأنت (أربعه×أربعه)
000
ياللي أحبك حب كنه من هناك إليا هناك
لا والله ان الحب لك ما عدت أقدر أجمعه
قد نصفي الأول معك خذ نصفي الثاني معاك
وان جيت أبي ربعي عليك الله لي لا ترجعه
000
خذ بعـضي.. وكلي وخذ.. ما قول لك يا غير هاك
خذ من ضلوعي المستقيم..أعوجه ما انت بْموجعه
خذني وانا شاريك مابي من رضاك الاّ رضاك
دام أنت في وقت الرخا لا تنزل الحب أطلعه
000
خلني بجول بْخاطرك لو با تسميه انتهاك
يْبان في عيونك كلام مْتعبك ومجمعه
اتبان كلمة حب ما هي حلوه الاّ من شفاك
كلمه تسوي بين مجموعة ضلوعي معمعه
000
اتشجع وْقل ما يردك من حياك الاّ حياك
وقف شعر جنبي بها واسمع صدى واستمتعه
قلها عشان مْتيمك يا تارك العالم وراك
لا فٌضّ فُو من قالها وْلا فُضّ فُو من شجعه
000
قلْها كذا والاّ كذي والاّ كذيّه أو كذاك
كلي أذان ٍصاغيه وإلاّ الأيادي مربعه
ما هو بخوف إلاّ احترامك يفرقك عن من سواك
ما هو غلا إلاّ الغلا لوما تبعك آتبّعه
000
هذا خفوقي ما تعود عالدلع والله بلاك
قم دلّعه وش منتظر قم دلّعه.. قم دلّعه
وهذا القصيد اللي كتبته فيك قلته من وراك
شف كيف أبواب القوافي المحكمات مْشرعه
000
هذه القصيده لك.. وهذي لك.. وتيّه لك.. وتاك
خذ واحفظ اللي يعجبك وان جيت باكر سمّعه
جيتك بقلبي مدري قلبي جابني لك واحتراك
واللي ينادينا تعب صوته.. شحب ما نسمعه
000
وفـْ موعدك مدري من اللي شجع الثاني وجاك
هو قلبي اللي جا معي..؟ والاّ أنا جيتك.. معه؟
